Takimi kishte në qendër temën “Qyteti-Universiteti-Sporti,” duke synuar shkëmbimin e përvojave më të mira për organizimin e një kampionati dinjitoz.
Eventi “Tirana 2023” është jo vetëm një nga më sfiduesit në programin e Shoqatës Europiane të Sportit Universitar EUSA, por gjithashtu një nga ngjarjet kryesore në agjendën e saj. Pritet që ky kampionat të jetë një mundësi unike për të treguar përkushtimin dhe aftësitë organizative të qytetit të Tiranës dhe institucioneve përkatëse.
Veliaj vlerësoi rëndësinë e sportit universitar për zhvillimin e studentëve dhe angazhimin e Bashkisë së Tiranës në mbështetje të aktiviteteve që forcojnë lidhjet midis universiteteve dhe komunitetit lokal.
“Përgatitjet për këtë kampionat jo vetëm që do të ketë një rëndësi të veçantë për studentët tanë, por dhe një mundësi ku do të promovoj Tiranën si një qytet mikpritës për ngjarje ndërkombëtare,”- u shpreh Veliaj.
Kampionati, i cili do të zhvillohet nga data 26 qershor deri më 5 korrik 2023, pritet të mirëpresë ekipe universitare nga e gjithë Europa, duke e bërë atë një nga ngjarjet më të mëdha sportive të zhvilluara në Shqipëri.
Federata Shqiptare e Sportit Universitar FSHSU, shprehu mirënjohjen për mbështetjen e pandërprerë të Pushtetit vendor dhe veçanërisht të Veliaj, i cili ka luajtur një rol kyç në sigurimin e kushteve optimale për realizimin e këtij kampionati të nivelit të lartë.
