Ky kompeticion përfshiu 61 Universitete nga e gjithë bota dhe ofroi mundësinë për studentët e të gjitha niveleve të garojnë në disa sporte, duke promovuar bashkëpunimin ndërkombëtar dhe shëndetin.
Sporti universitar shqiptar u përfaqësua nga tre ekipe të ndryshme:
Futsall Meshkuj, Kolegji Universitar i Biznesit – KUB,
Futsall Meshkuj, Universiteti “Eqerem Çabej,”
Basketboll Meshkuj, Universiteti Bujqësor i Tiranës.
Këto ekipe treguan përkushtim dhe aftësi të larta në fushën e lojës, duke përfaqësuar Shqipërinë me krenari në një kompeticion të nivelit të lartë ndërkombëtar.
Një nga momentet më të spikatura të këtij kompeticioni ishte performanca e ekipit të futsallit të Kolegjit Universitar të Biznesit (KUB), i cili arriti të renditet në vendin e dytë në këtë disiplinë.
Ekipi i KUB fitoi katër ndeshje me rezultate mbresëlënëse, përfshirë një fitore të merituar në gjysmëfinale kundër Universitetit të Beogradit me rezultatin 3-0. Ky sukses është një dëshmi e përkushtimit dhe talentit të studentëve shqiptarë në arenën ndërkombëtare.
Çdo vit, numri i universiteteve shqiptare që marrin pjesë në kompeticione ndërkombëtare si “PCU Games” është në rritje, duke reflektuar përmirësimin e vazhdueshëm të sportit universitar në Shqipëri. Përveç pjesëmarrjes, performanca e ekipeve shqiptare në këto gara po bëhet gjithnjë e më konkurruese, duke sjellë rezultate të shkëlqyera dhe duke ngritur imazhin e sportit universitar shqiptar në nivel global.
Federata Shqiptare e Sportit Universitar FSHSU, vlerësoi seriozitetin dhe përkushtimin e të tre universiteteve pjesëmarrëse.
Pjesëmarrja në “25th PCU Games” është një hap i rëndësishëm për zhvillimin e sportit universitar në Shqipëri. Këto kompeticione jo vetëm që ofrojnë një platformë për të shfaqur talentin e studentëve, por gjithashtu krijojnë mundësi për shkëmbime ndërkombëtare dhe përmirësimin e standardeve sportive në vend.
