Ditën e sotme, FSHSU rinisi sezonin e kampionateve kombëtare universitare dhe pikërisht me ping pongun. Nën kujdesin e Presidentit të FSHSU Z. Besnik Veliu, mbështetjen e Federatës Shqiptare të Ping Pongut dhe Ministrisë së Arsimit dhe Sportit, nisi ky kampionat i cili do të vazhdojë për dy ditë.
Patëm nderin që në ceremoninë hapëse të ishte i pranishëm dhe Presidenti i Komitetit Kombëtar Olimpik Shqiptar, Z. Fidel Ylli, një mbështetës i zëshëm i yni dhe një promovues i gjithë sportit shqiptar univeristar. Në fjalën e tij përshëndetëse Z. Ylli tha se vlerat olimpike të sportit ishin më të nevojshme se kurrë në këto momente, për të na sjellë më pranë duke lënë mënjanë konfliktet.
Z. Veliu, në fjalën e tij tha se po, ishte e mundur të ishim rivalë të ashpër në fushë dhe po në të njejtën kohë ti shtrimë dorën njerit tjetrit në paqe dhe respekt. Presidenti nënvizoi se 2 kampionët e kampionatit të kaluar do të përfaqësojnë Shqipërinë në Universiadën Botërore e cila do të zhvillohet në Chengdu (Kinë). Gjithashtu dhe fituesit e këtij kampionati të dytë do të përfaqësojnë vendin tonë në garat botërore të ardhshme.
Vlen për tu theksuar se ky është kampionati i dytë kombëtar i ping pongut që zhvillohet mes të gjithë universiteteve shqiptare. Me pjesëmarrjen e mbi 150 atletëve nga 16 Universite të ndryshme, ky ishte Kampionati më i madh i ping pongut zhvilluar deri më sot.
Ejani nesër në Pallatin e Sportit Asllan Rusi, të ndjekim bashkë ndeshjet e zjarrta të fazës finale të Kampionatit!
Për një rini aktive, për një jetë të shëndetshme dhe për të gëzuar bashkë!
