Ky takim e hapi rrugën për një nismë të re bashkëpunimi, që pritet të sjellë përfitime të mëdha për të dyja palët në fushën e sportit universitar.Gjatë bisedimeve, Gunay vlerësoi punën e FSHSU-së për organizimin e aktiviteteve sportive që promovojnë jo vetëm mirëqenien e studentëve, por edhe krijimin e një komuniteti më të lidhur brenda universiteteve. Ai përgëzoi Shqipërinë për përkushtimin në zhvillimin e sportit universitar dhe rolin e tij në përmirësimin e cilësisë së jetës së studentëve dhe stafit universitar.
Një pjesë e rëndësishme e diskutimeve u përqendrua në krijimin e nismave bashkëpunuese dhe ndërvepruese midis dy federatave.
Dy presidentët ndanë ide për organizimin e aktiviteteve të përbashkëta dhe diskutuan mbi rëndësinë e shkëmbimit të eksperiencave midis universiteteve të të dy vendeve. Ky ndërveprim synon të sjellë praktikat më të mira për promovimin e sportit dhe përmirësimin e mundësive për studentët.
Një tjetër çështje e rëndësishme që u diskutua ishte mundësia e bashkëpunimit për organizimin e aktiviteteve dhe lojërave studentore në nivel ndërkombëtar. Turqia, një vend që ka shprehur interes për organizimin e Lojërave Europiane Studentore 2028, është një mundësi e shkëlqyer për të promovuar më tej sportin universitar dhe bashkëpunimin ndërmjet universiteteve të dy vendeve.
Ky aktivitet do të sjellë jo vetëm mundësi për zhvillim profesional, por dhe një mundësi për të rinjtë e dy shteteve që të garojnë dhe të krijojnë miqësi përmes sportit.
Ky takim përfaqësoi një hap të rëndësishëm për forcimin e marrëdhënieve sportive dhe nxitjen e zhvillimit të mëtejshëm të sportit universitar. Përpjekjet për bashkëpunim pritet të kenë një ndikim pozitiv për komunitetet universitare të Shqipërisë dhe Turqisë.
