Federata Shqiptare e Sportit Universitar (FSHSU) shpreh keqardhjen dhe kundërshtimin e saj të qartë ndaj ndryshimeve të miratuara në ligjin “Për sportin”, të cilat prekin drejtpërdrejt strukturën dhe funksionimin e sportit universitar në vend.
Ndryshimet e miratuara, veçanërisht dispozitat që i japin Komitetit Olimpik Kombëtar Shqiptar (KOKSH) kompetenca në organizimin e aktiviteteve jashtëprocesit mësimor në bashkëpunim me institucionet shtetërore (referuar nenit 6, pika 4/1 e projektligjit), përbëjnë një cenim të qartë të kompetencave të deritanishme të FSHSU-së si autoriteti ligjor dhe praktik në zhvillimin dhe administrimin e sportit universitar në Shqipëri.
Procesi i miratimit të këtyre ndryshimeve është zhvilluar pa një konsultim real me FSHSU-në, pavarësisht se ndikimi mbi sportin universitar është thelbësor. Ne nuk jemi ftuar për mendim, diskutim apo analizë për këto ndryshime që, në mënyrë tërthore, çojnë drejt shuarjes de facto të federatës sonë si strukturë funksionale, duke ia deleguar kompetencat një institucioni që nuk ka as kapacitetin dhe as përvojën për të zhvilluar sport në nivel universitar.
Sporti universitar ka specifika dhe nevoja të veçanta që nuk mund të përfshihen në mënyrë formale brenda një strukture të gjerë si KOKSH. Përvoja e vendeve të Bashkimit Evropian tregon se sporti universitar prej 1 shekulli është sektor i organizuar më vete, i lidhur ngushtë me arsimin e lartë dhe me një qasje zhvillimore që kombinon formimin fizik me përgatitjen akademike.
Në këtë frymë, FSHSU bën thirrje që të rishikohet urgjentisht ky ligj, të ndalet centralizimi i sportit në një strukturë e vetme dhe të respektohet parimi i specializimit dhe vetëqeverisjes në sport.
Ne mbetemi të hapur për një reformë reale dhe gjithëpërfshirëse në sport, por nuk mund të pranojmë që ajo të ndodhë përmes mohimit të rolit dhe ekzistencës së federatave që për vite me radhë kanë kontribuar në edukimin sportiv të brezave të rinj.
