Ky aktivitet i rëndësishëm sportiv mbodhi sot 32 ekipe dhe rreth 100 studentë nga mosha 18 deri në 30 vjeç, që përfaqësojnë universitete dhe institucione të arsimit të lartë nga Shqipëria, Mali i Zi, Maqedonia, Italia dhe Kosova.
Ceremonia e hapjes filloi me fjalimin e Presidentit të FSHSU-së, Besnik Veliu, i cili u uroi suksese të përzemërta për ekipet dhe theksoi rëndësinë e këtij eventi për promovimin e sportit universitar në Shqipëri.
“Suksese të gjithë pjesëmarrësve në këtë event të veçantë që ndriçon qytetin e Vlorës dhe që promovoni vlerat e sportit universitar!”
Ai gjithashtu falënderoi Bashkinë Vlorë dhe Kryetarin e saj, Ermal Dredha, për mbështetje dhe përfshirjen e sportit universitar në kalendarin e aktiviteteve të vitit si Kryeqyteti i Sportit Europian.
Në këtë ceremoni mori pjesë edhe Nënkryetari, Klevis Kaso, i cili falënderoi ekipet dhe vendet pjesëmarrëse për energjinë që rinia përcjell në këtë event të rëndësishëm. Ai nënvizoi rëndësinë e aktiviteteve të tilla për të nxitur pasionin për sportin dhe për të krijuar një atmosferë pozitive mes të rinjve.
Turneu Universitar i Beachvolley “Vlora 2024” jo vetëm që inkurajon garën e ndershme dhe sportivitetin mes studentëve, por gjithashtu promovon rëndësinë e sportit si një komponent thelbësor për zhvillimin personal dhe bashkëpunimin ndërkombëtar.
