Pesë javë plot adrenalinë, përballje, triumfe në basketboll, volejboll dhe futsall, duke sjellë bashkë jo vetëm garën, por edhe frymën e solidariteti dhe pasionit për sportin.
Pjesëmarrja e figurave të rëndësishme, si Ministrja e Arsimit dhe Sportit, Ogerta Manastirliu, Presidenti i Federatës Europiane të Sportit Universitar, Adam Roczek, si dhe Presidenti i Federatës Shqiptare të Futbollit, Armando Duka, konfirmuan rëndësinë e këtij eventi, jo vetëm si një turne sportiv, por si një platformë e rritjes dhe përfaqësimit ndërkombëtar.
Në fjalën e tij, Presidenti i Federatës Shqiptare të Sportit Universitar, Besnik Veliu, përshëndeti të gjithë pjesëmarrësit dhe shprehu dashamirësinë për suksesin e këtij turneu. Veliu, theksoi se ky është një tjetër hap i rëndësishëm për sportin universitar në Shqipëri dhe një dëshmi e angazhimit të institucioneve për të mbështetur sportin akademik.
Gjithashtu, Presidenti i Federatës Universitare njoftoi se: “Shqipëria është zgjedhur për organizimin e Kampionatit Europian të Sporteve Luftarake në vitin 2026, ky është një moment historik për sportin universitar shqiptar, pasi Tirana do të mirëpresë rreth 1500 studentë nga e gjithë Evropa, të cilët do të garojnë në Judo, Karate, Kick-Boxing dhe Taekwondo.”
Në kuadër të turneut, një moment i veçantë ishte ndërimi me titull nderi për Mimoza Tare, një vlerësim i merituar për punën dhe përkushtimin e palodhur në sportin universitar. Kontributi i saj ka ndihmuar në zhvillimin dhe promovimin e sportit në institucionet akademike, duke frymëzuar breza të rinj drejt aktiviteteve sportive dhe garave ndërkombëtare.
Ky turne nuk është thjesht një garë, por një mundësi për studentët që të shpalosin talentin e tyre, të krijojnë lidhje të reja dhe të përjetojnë frymën e konkurrencës së ndershme. Turneu do të zgjasë plotë pesë javë, gjatë të cilave studentët do të konkurrojnë për titujt kampionë në secilën disiplinë.
Ky turne është një shembull i alegrisë, bashkëpunimit, emocioneve, mbështetjes, pjesëmarrjes, organizimit, vullnetarizmit, pasionit dhe mikpritjes unike që karakterizon sportin universitar në Shqipëri.
Me një organizim të shkëlqyer dhe një pjesëmarrje të gjerë të dashamirësve të sportit, Turneu Universitar i Tiranës 2025 premton të jetë një nga ngjarjet më të rëndësishme dhe një nga më të sukseshme të organizuar nga FSHSU.
