Ky turne internacional, i cili u zhvillua në qytetin e Vlorës, përfshiu pjesëmarrje nga vendet ballkanike dhe më gjerë, i cili u mbështet plotësisht nga Bashkia e Vlorës, duke ofruar një mundësi për studentët sportistë të tregojnë aftësitë e tyre dhe të kontribuojnë në promovimin e Sporteve Universitare.
Gjithashtu, këtë vit Bashkia Vlorë në këtë turne ndërkombëtar, mban statusin e Kryeqytetit Sportiv Europian 2024.
Ekipet kampione në turneun e beachvolley për femra dhe meshkuj treguan aftësi të larta teknike dhe shpirt garues.
Në kategorinë e femrave, Universiteti i Prishtinës, UP, fitoi vendin e parë, duke treguar një performancë të shkëlqyer. Vendi i dytë shkoi për Universitetin e Tiranës, ndërsa vendi i tretë për Universitetin e Sporteve të Tiranës, skuadra Tomi & Jerry.
Në kategorinë e meshkujve, vendin e parë e fitoi Universiteti i Prishtinës, Gjilani, duke demonstruar një performance të sukseshme. Vendi i dytë i shkoi Universitetit të Tetovës, skuadra Studenti, ndërsa vendi i tretë shkoi për Universitetin e Prishtinës, skuadra Dardanët.
Ky turne theksoi edhe një herë rëndësinë e vazhdimit të mbështetjes për aktivitete Sportive Universitare në Shqipëri dhe jashtë saj. Turneu ka shërbyer si një platformë për të nxitur të rinjtë të angazhohen në aktivitete fizike, të zhvillojnë aftësitë e tyre dhe të kontribuojnë në një shoqëri më të shëndetshme dhe më aktive.
Federata Shqiptare e Sportit Universitar (FSHSU) falenderoi përzemërsisht të gjithë pjesëmarrësit që dhanë maksimumin në këtë turne si dhe përcolli urimet për të gjitha ekipet fitimtare. Gjithashtu, theksoi rëndësinë e zhvillimit të sportit universitar, i cili ka një ndikim të drejtpërdrejtë në formimin e karaktereve të të rinjve dhe nxitjen e bashkëpunimit mes Universiteteve.
Turneu Universitar i Beachvolley Vlora 2024 ka pasqyruar një sukses të madh për organizatorët, pjesëmarrësit dhe qytetin e Vlorës.
